تازہ ترین

وزرات خزانہ کا پیٹرولیم مصنوعات کی قیمتوں میں کمی کا نوٹیفکیشن جاری

اسلام آباد (آئی این پی )وزرات خزانہ نے پیٹرولیم مصنوعات کی قیمتوں میں کمی کا نوٹیفکیشن جاری کر دیاگیا۔ گزشتہ روز وزیراعظم عمران خان کی معاون خصوصی برائے اطلاعات ڈاکٹر فردوس عاشق اعوان نے پیٹرولیم مصنوعات کی قیمتوں میں 7 روپے سے زائد کی کمی کا اعلان کیا تھا۔ تاہم اب وزرات خزانہ کے نوٹیفکیشن میں پیٹرولیم مصنوعات کی قیمتوں میں زیادہ سے زیادہ 5 روپے 63 پیسے کمی گئی ہے۔ نوٹیفکیشن کے مطابق پیٹرول کی نئی قیمت 4 روپے 59 پیسے فی لیٹر کمی کے بعد 113 روپے 24 پیسے فی لیٹر ہو گی جب کہ ہائی اسپیڈ ڈیزل کی فی لیٹر قیمت 5 روپے 33 پیسے کمی کے بعد 127 روپے 14 پیسے ہوگی۔ لائٹ ڈیزل آئل 5 روپے 63 پیسے کمی سے 91 روپے 89 پیسے فی لیٹر جب کہ مٹی کا تیل 4 روپے27 پیسے فی لیٹر کمی کے بعد99 روپے57 پیسے فی لیٹر فروخت ہو گا۔وزارت خزانہ کے مطابق پٹرولیم مصنوعات کی نئی قیمتوں کا اطلاق یکم ستمبر یعنی ہفتہ کی رات 12 بجے سے ہوگیا۔یاد رہے کہ آئل اینڈ گیس ریگولیٹری اتھارٹی (اوگرا)نے پیٹرولیم ڈویژن کو سمری ارسال کی تھی جس میں پیٹرول کی فی لیٹر قیمت میں 5 روپے اور ڈیزل کی فی لیٹر قیمت میں 7 روپے 50 پیسے کمی کی سفارش کی گئی تھی۔اوگرا نے مٹی کے تیل کی قیمت میں ساڑھے 4 روپے فی لیٹر اور لائٹ ڈیزل آئل کی قیمت میں ساڑھے 5 روپے فی لیٹر کمی کی سفارش کی گئی تھی۔ ادھر آل پاکستان سی این جی ایسوسی ایشن نے بھی سی این جی کی قیمتوں میں بھی چارروپے چالیس پیسے فی کلو کمی کا اعلان کیاہے جس کے مطابق فی کلو گیس کی قیمت پچاسی روپے پچاس پیسے ہوگی ، نئی قیمت کا اطلاق ہفتہ کی شب رات بارہ بجے سے ہوگیا ۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*